Keon: 2 gov’t agencies coddling illegal loggers

NEWS

RONDA NORTE

Ama, kinabkabil ti anakna natay

PIDDIG, ILOCOS NORTE – Dead-on-arrival iti ospital ti 69-tawenna a lalaki kalpasan ti panangkabkabil kenkuana ti anakna iti Barangay Tonoton iti daytoy nga ili.

Binigbig ni Piddig police chief Teddy Rosqueta ti biktima a ni Ernesto Calaranan.

Insigida met a naarestar ti suspek a ni Bonifacio, 27.

Ti suspek ti nakapungtot a nangkabkabilanna ti amana kalpasan a nagkedked ti naud-udi a mangted ti kuarta a maigatang ti sigarilyo.

Napasamak ti insidente iti pagtaengan ti agnagan Segundo dela Cruz iti isu met laeng a barangay a nagdanunan dagiti agama.

Palawag met ni Nana Estela, nga adda ti diperensia ti panagpanpanunot ti anakda,

Pinuoran pay ketdi ni Bonifacio ti pagtaenganda nga awan ti gapgapuna idi 2006.

Inpila dagiti pulis ti kaso a parricide kontra iti suspek.

Brgy kagawad, nasugatan Iti pammaltog

SAN NICOLAS, ILOCOS NORTE – Nasugatan ti 78-tawenna a barangay kagawad kalpasan a pinaltopaltogan dagiti dua a lallaki a nakamotorsiklo iti Barangay 9 iti daytoy nga ili.

Ti biktima a ni Vicente Daoang Sr., ti nakatugaw ken makisarsarita iti live-in partnerna ken iti anak ken apokona a babbai iti ruanganda idi agsardeng iti paraanganda ti motorsiklo a nagluganan dagiti suspek.

Apagbaba dagitoy iti motorsiklo, insigida a nagpaputok ti paltog ti maysa kadakuada.

Natamaan iti akin-kanigid a saka ni Daoang ngem inkarigatanna pay laeng ti nagkaradap a simrek iti pagtaenganda ken dagiti kakaduana.

Insigida met a naglibas dagiti suspek a nagpa-amianan manipud iti naggapuanda a direksyon.

Naitaray iti ospital ni Daoang gapu iti sinagabana a sugat. Nadanggisan met iti ima ti apoko ni Daoang a ni Karen Mammuad.

Awan met pay maipalawag ni Janet Lasaten, live-in partner ni Daoang, a mabalin a motibo iti pammaltog.

Nakarekobre dagiti nagresponde a pulis ti 3 kapsula ken 1 buli ti caliber .45.

Ni Daoang ti nagserserbi a barangay chairman iti naunday a tawen sakbay a nagbalin a barangay kagawad.

Lakay nga addaan sakit, nagpakamatay

LAOAG CITY – Nagbekkel ti maysa a lakay iti puon ti mangga iti kabakiran a paset ti Barangay 55-C Vira iti daytoy a siudad.

Nabigbig daytoy a ni Federico Pidong, 67.

Palawag ni Nana Patricia, mabalin a naaramid daytoy ti asawana gapu iti pannakapukawen ti namnamana a malaingan pay ti sakitna nga ulcer. Degdegan daytoy iti kaawan ti igatangdan ti agasna.

Saanna a ninamnama nga ipaypayso ti asawana ti mangkettel ti biagna gaputa namin-uppat a darasen nga ibagbagana a kayatnan a gibusan ti panagrigrigatna gapu iti sakitna.

Im-imbestigaren met ti polisia nu adda ti foul play iti pannakatayna.

Ina dagiti agkabsat a maatap a swindler, iggem ti PNP

BATAC CITY – Kinemmeg dagiti pulis ti maysa nga ina a maipagarup a kakunsabo dagiti agkabsat a mapagsuspetsaan a swindler iti daytoy a siudad.

Nabigbig daytoy ani Trinidad Galimba, 60, ina da Rose Negre ken Bellaflor Espiritu.

Dagiti agkabsat ti maipagarup nga agpampammarang nga agtarimaan ti alahas ngem sukatanda dagitoy iti peke a saan a mapupuutan ti biktima. Ti met ina da ti maitudtudo a mapan agilako kadagiti maitarayda nga alahas. Sumagmamano a mangisursuro iti Parangupong Elementary School dagiti nagbalin a biktima.