Dua a brgy chairman, natiliwan kadagiti hig-powered firearms PAGUDPUD, Ilocos Norte—Natiliwan ti Association of Barangay Councils (ABC) President ken maysa pay a barangay chairman iti daytoy nga ili kadagiti nangangato ti kalibrena a paltog iti nagsina a search operation nga inwayat dagiti operatibas ti Criminal Investigation Group ken Provincial Mobile Group iti Philippine National Police (PNP). Immuna a naarestar ni Barangay Chairman Melchor Madela iti Barangay Agassi kalpasan a naala iti pagtaenganna dagiti awan ti lisensiana a paltog a pakairamanan ti M-16 armalite rifle ken shotgun, kasta pay ti granada ken bulletproof vest. Naala pay iti pagtaengan ni Madela ti maysa a 9-mm pistol ngem adda ti inpakitana a papelesna. Iti Barangay Subec, naala met iti pagtaengan ni Chairman Cornelio Rosete, presidente ti Association of Barangay Council iti nasao nga ili, ti maysa a shotgun ken nagduduma a bala ti paltog. Namuanganay ti inwayat nga operasion dagiti autoridad gapu iti reklamo dagiti sumagmamano nga umili a maipagarup a panagpappaputok ti paltog dagiti nasao nga opisial. Awan met ti maipalawagda Madela ken Rosete nu apay nga addaanda kadagiti nasao nga igam. Naipilan ti kaso nga illegal possession of firearms kontra kadakuada. PIDDIG, Ilocos Norte—Nasarakan dagiti scavengers ti maysa a nauram a bangkay iti daan a dumpsite iti daytoy nga ili. Marigatan dagiti imbestigador a mangbigbig ti kinasiasinno ti biktima gapu ta agrup-rupsan ti bangkayna. Kuna ni Municipal Health Officer Diophantos Acob, masapul ti tulong dagiti eksperto manipud National Bureau of Investigation tapno mabigbig dagiti pagilasinan iti biktima. Kuna ni Inspector Reynante Baltazar, hepe ti polisia iti nasao nga ili, mabalin a natayen ti biktima idi maikarton ket uramenda ti bangkayna iti dati a dumpsite a masarakan iti Barangay Boyoboy. Patienna a ti biktima ket manipud iti sabali nga ili wenno probinsia. Naammuan a daytoyen ti maikatlo a gundaway nga adda ti masarakan a bangkay iti nasao a dumpsite. BACARRA, Ilocos Norte—Binisita ni Jasmine Rumbaoa ti tanem ti kabagyanna iti maysa a sementerio iti daytoy nga ili kaduana ti nobiana a ni Catherine Rumbaoa ken ti pagayamda a ni Kimberly Jane Picar. Iti saan a ninamnama, adda ti nagririan dagiti agnobia. Nagpaputok ti paltog ni Jasmine. Adda dagiti nakangngeg ket intawagda iti kaasitgan nga istasion ti polisia. Sakbay a nakasangpet dagiti pulis, naipa-iggem ni Jasmine ti calibre .22 pistol kenni Kimberly. Naala ngarud dagiti nagresponde a pulis ti paltog iti ikot ni Kimberly. Nagpalawag isuna ngem saanen a dinengngeg pay dagiti pulis. Maisagsaganan ti pannakaipila ti kaso nga illegal possession of firearms kontra kenkuana. BACARRA, Ilocos Norte—Nabuak dagiti empleado iti munisipio iti daytoy nga ili kalpasan a maysa a babai ti maipagarup a nangiserrek ti granada ken nagpangta a pabettakenna daytoy. Ngem idi makatiempo dagiti pannakabagi ti linteg, balligi a naagaw ni SP02 Marcelino Corpuz ti granada iti babai. Binigbig dagiti autoridad ti babai a ni Marla Corea, 23, agnaed iti Barangay Buyon ken maipagarup a biktima ti gang rape itay napan a tawen. Problemado ni Corea gapu iti panagririda iti boyfriendna a ni Ruben Manaday seknan iti kuarta. Ditoy nga innalana ti granada a kukua ni Manaday. Atapen ti polisia nga adda ti diperensia iti panagpanpanunot ni Corea isuda a kalikagumda nga idalan iti psychiatric test. Nupay kasta, inpila latta ti Philippine National Police (PNP) ti kaso nga illegal possession of explosive kontra kenni Corea. Kinontra met ni Corea dagiti akusasion kontra kenkuana. Kunana, saan a pudno nga adda ti diperensia ti panagpanpanunotna. Inbatadna a nagturong isuna iti munisipio tapno isukona koma ti naalana a granada iti boyfriendna. Ni Corea ti naikumiten iti Ilocos Norte Provincial Jail.
BANNA, Ilocos Norte—Saanen a naisalbar pay ti biag ti kabsat a babai ti KBP (Kapisanan ng mga Brodkaster sa Pilipinas) coordinator iti daytoy a probinsia gapu iti sinagabana a bagkong iti barukong. Ti biktima a ni Elena Lauricio, kabsat ni KBP Regional Coordinator Ric Lauricio, ti binagkong dagiti tallo a lallaki kalpasan nga agawenda ti bagna a naglaon ti saan pay nga ammo ti dagupna a kuarta. Agawiden ti biktima idi saeden dagiti agur-uray a suspek iti sango ti videoke barna iti Barangay Macayepyep iti nasao nga ili. Iti hot pursuit operation ti polisia, natiliw ti dua kadagiti suspek ada Noel Dannog ken Marcel Macaburas. Manarimaan met ti manhunt operation ti polisia iti maysa pay a suspek ani Rodel Agliday.
LAOAG City—Nakasagana ni Bishop Ernesto Salgado iti Diocese of Laoag nga agpirma ti sertipikasion nga awanen ti operasion ti jueteng iti Ilocos Norte laketdi umanamong amin a parish priest. Adda man amak ni Salgado a mabalin nga agsubli met laeng ti operasion ti jueteng apaman a bumaaw ti nasao nga issue, ngem kalikagumna nga ikkan ti gundaway ti gobierno a mangipaneknek a sinsero iti narugianna nga all-out war iti nasao a sugal. Bayat maisursurat daytoy a damag, addan pito nga ili iti daytoy a probinsia ti nangisumiter ti sertipikasion a jueteng-free iti lugarda. Malagip a paset iti napaigetan a kampania ti gobierno iti sugal a jueteng, inbilin ni PNP Chief Arturo Lumibao nga agpirma ti serpikasion ti polisia, dagiti papadi ken local government units nga awanen ti jueteng iti masakupanda a lugar. Nu maysa kadakuada ti saan nga agpirma ket dumalan iti imbestigasion dagiti opisiales iti nasao a lugar.
PAOAY, Ilocos Norte—Inadmitir ti polisia a nagsubli manen ti operasion dagiti maatap a drug personalities iti daytoy nga ili. Mamati dagiti pannakabagi ti linteg a gapu daytoy iti umadamin a panaglulukat ti klase. Maipagarup a target dagiti drug pushers dagiti agtutubo. Gapu itoy, pinaigetan dagiti pannakabagi ti linteg ti kampaniana kontra iti nasao nga illegal nga aktibidad. Kagiddan daytoy ti pannakatiliw ti maysa a maatap a drug pusher iti Brgy. 17. Nabigbig ti naarestar a ni Tirso Judalena, 27, agnaed iti nasao a barangay. Naala kenkuana ti maysa a plastic sachet ti shabu. Maipagarup nga iti mismo a pagtaengan ti suspek ti nakaiwayatan ti transaksion ti droga a nakaaktuan kenkuana dagiti adipen ti linteg. Positibo met isuna iti medical examination nga agus-usar ti maipawil a droga. Adda pay tallo a nabatbati iti drugs watchlist ti polisia. |
|