RISSIK (2)
Victor U. Andal

BUMARBARA ti issue iti jueteng. Iti privilege speech ni Senate Minority Floor Leader Aquilino Pimentel iti Senado, inikkanna ti paulo nga “The Probe on Jueteng Calls for Probers with Clean Hands”. Ditoy nga indetalyena dagiti addang a rebbengna a maaramid tapno nakappapati ti maiwayat nga imbestigasion iti nasao nga illegal a sugal ket saan nga agparang a grandstanding laeng iti biang ti senado. Kontra ni Pimentel kenni Senador Lito Lapid, chairman ti Committee on Games, Amusement and Sports a mangidaulo ti imbestigasion gapu iti kaawan ti kapabilidadna. Malagip a ti Pampanga a probinsia ni Lapid ti maysa kadagiti kangrunaan a nagrairaan ti jueteng.

Kalikagum met ni Senador Juan Ponce Enrile a maammuan nu ania ti pudpudno a gagem ti imbestigasion mainaig iti jueteng. Nu ti imbestigasion kadi ket in aid of legislation wenno purposes of prosecution?

Wen met ngamin, ania ti kayat a paneknekan dagiti dadduma a senador iti maiwayat nga imbestigasion? Ania ti pagngudduanna, addanto ngata maipilaan ti kaso? Kabaelanda ngata ikkaten ti maskara a mangkalkalob ti kinataoda M1, M2 ken JS7 a maipagarup nga adda iti likudan ti operasion ti jueteng iti intero a pagilian?

Nu in aid of legislation ti maangay a Senate inquiry, ania kadi pay dagiti pagkurkurangan ti anti-gambling law a pinirmaan ni Presidente Gloria Arroyo addan dua a tawen ti napalabas a nangpatibker ti pannakaipaay ti nadagdagsen a pannusa kadagiti agsalungasing? Saan ngata a ti masapul ket prosecution wenno conviction?

-o0o-

Naundayen a panawen a mapagsasaritaan ti isyu ti jueteng. Ngem adda kadin dagiti nadusa a dadakkel a personalidad nga adda iti likudan ti nasao a sugal? Naaramat laeng ti nasao nga isyu a nangpadisi iti puesto kenni dati a Presidente Joseph Estrada. Hmm.. Aramaten met ngata daytoy ti oposision a mangagaw ti turay kenni Madam Gloria nangruna ket madakdakamat ita ti naganda First Gentleman Mike Arroyo ken Pampanga Representative Mikey Arroyo iti isyu ti jueteng?

-o0o-

Inbutaktak ni House Minority Leader Francis Escudero ti plano dagiti gambling lord tapno maibaw-ing ti atension ti publiko mainaig iti issue ti jueteng.

Nagballaag iti mabalin a pannakaiwayat ti disinformation campaign tapno madadael ti kredibilidad ti simbaan Katoliko karaman dagiti dadduma a kameng ti media a naiget a kumonkontra iti nasao a sugal. Kunana, a kabaelan daytoy a pondoan dagiti gambling lord.

Mainaig itoy, saan a naalarma ti simbaan Katoliko iti Ilocos Norte. Kuna ni Bishop Ernesto Salgado iti Diocese of Laoag, a naminsan metten a nadakamat ti naganna idi katugtugawna kas obispo mainaig iti maipagarup nga iyaawatna ti donasion manipud kadagiti gambling lord. Ngem kuna ni Salgado, awan ti nangpatol ti nasao nga akusasion. Kunana, ti nadalus a konsensiana ti nagbalin nga armasna kontra kadagiti naggandat a mangdadael ti reputasion ti simbaan.

Malagip a gapu iti expose ni Pangasinan Archbishop Oscar Cruz seknan iti jueteng payola, mangiwayat ti Senado iti inquiry.

Binalakadan pay ni Escudero ni Madam Gloria a suspensuenna ti gobernador wenno mayor malaksid ti pannakarelibo ti chief of police wenno police provincial director nga adda ti jueteng iti masakupanna a lugar tapno maipakitana ti sinseridadna iti all-out war kontra iti jueteng. Kuna ti diputado, a basar iti paglintegan, adda bileg ti presidente a mangipataw ti 90-day preventive suspension iti maysa a nabutusan nga opisial ti gobierno. Iti biang ti Philippine National Police, adda karbengan ti presidente nga insigida a mang-relieve ti maysa a police officer.

Ana met dayta nagbalin a rakurak ti maysa a cabinet secretary, aggapu pay iti Department of Justice. Kuna ketdi ni Secretary Raul Gonzales a pilaanna ti kaso dagiti agserbi a whistle-blower gapu iti arigna panangadmitirna ti involvementna iti jueteng. Siasinno pay ngarud ita ti mayat nga agtestigo? Nu sika, ania ti ammom a nagdumaanda iti maysa nga Ilocos Sur Governor Luis “Chavit” Singson?

Malagip a ni Singson ti nagtestigo kontra iti dati a gayyemna a ni napadisi a Presidente Joseph Estrada mainaig iti isyu ti jueteng payola. Bannuar, dayta pay ketdi ti nangibilanganda idi kenni Singson.

Ita, pilaan ketdi ti DOJ ti siasinnuman nga agtestigo?

Sumagmamano laeng met nga aldaw kalpasan nga inlatak ti PNP ti all-out war kontra iti jueteng, inpasindawna a nagsardengen a naminpinsan ti operasion ti nasao a sugal iti Regions 1, 2 ken 3. Naipresentar pay dagiti natiliwda a kubrador ti jueteng manipud kadagiti nagduduma a paset ti Luzon.

Arigna ti kaibilanganda dagiti kriminal a naisango iti media a nakabado iti tangerine ken ineskortan ti narway a pulis. Inaramid kadi daytoy ti PNP tapno maipakita laeng iti publiko a seryoso ti kampania ti gobierno kontra iti nasao a sugal? Whew! Mamatiak laeng dayta nu makitak dagiti big-time jueteng lord ken dagiti protektor a maarestar ken isuda ti maipresentar iti publiko.

Para iti ibatik a pagpampanunutan, mabasa iti Salmo 30:12, “Tapno ti kinadayagko ikankantana koma ti panangidaydayaw kenka ket saan nga agulimek. O Jehova a Diosko, agyamanakto kenka nga agnanayon.”

Now, instead of complaining the thorns on roses, be thankful for the roses among the thorns.