RISSIK
Victor U. Andal

MABALIN a nagriro dagiti nasapa a nangrukod ti kabaelan ni Laoag City PNP Chief Reynante Partible nangruna iti pannakaiwardas dagiti adda iti babaenna gapu iti maipagarup a kinalukayna kadagiti immunan a nagserbianna kas hepe ti polisia iti dadduma nga ili iti Ilocos Norte. Adda dagiti nagkuna a narigatna a maartapan ti kinaiget idi ni dati a City PNP Chief Joel Pagdilao a nangipakat ti pannakadisiplina dagiti pulis iti siudad ti Laoag.

Da SP01 Apolinario Belver, SP01 Basilio Andres ken P02 Marlon Ansagay ti ad-adda a pinilida ti nagpaibalud iti sumagmamano nga oras iti mismo a selda ti PNP Laoag ngem ti suspensuen ida ni Supt. Partible. Naasut ti pungtot ni Partible kalpasan a saan nga inkankano dagiti nasao a pulis ti direktibana ken saanda nga inpakpakaammo ti nagturturunganda bayat a naka-dutyda. Pinagpili ida ni Partible nu kaykayatda ti maikarsel wenno masuspenso. Mabalin a ti rason a pinili dagiti nasao a pulis ti maikarsel, ket gapu iti saanda a pannakaawat dagiti nagduduma a benepisioda malaksid laeng iti saanda a panagsueldo inkaso a masuspensoda.

Sigurado daytoy nga inaramid ni Partible, mariing dagiti agsusugel a naka-duty a pulis nu adda man.

Dakkel pay ngamin a saludsod nu kasano a sinerrek dagiti agtatakaw ti maysa a cellphone outlet a masarakan iti arigna sango laeng ti police outpost iti Rizal Street. Amangan met ngamin nu matmaturog dagiti naka-duty dita? Nu ti pasdek negosio nga adda laeng iti asideg ti police outpost ket natakawan a saan a napupuutan dagiti naka-duty dita a pulis, ay ket ad-adda manen ah dagiti sabsabali nga establisimento nga adda iti sentro ti siudad.

Naammuan nga addan tallo a pasdek negosio a sinerrek dagiti agtatakaw iti siudad itay napan a Mayo.

Malaksid itoy, sapay koma ta umalerto met dagiti adda iti intelligence division iti PNP Laoag nga agmonitor kadagiti drug personalities nangruna ta maipagarup nga aktibo manen ti problema iti illegal drugs gapu iti panagsardeng ti operasion ti illegal a sugal a jueteng.

Palakpakan!!! Numero uno ti Pilipinas iti intero a lubong iti nagduduma nga aspeto bayat ti termino ni Madam Señora Doña Gloria Arroyo ken dagiti alipuresna iti kabinete.

Immuna a naibilang ti Pilipinas kas “most murderous place” para kadagiti journalists iti intero a lubong gapu ta dandani umabuten iti sangagasut a mediamen dagiti napapatay sipud 1986. Maikadua laeng ti Iraq iti laksid nga adda ti mapaspasamak idiay a civil war. Ngamin ditoy Pilipinas adda dagiti grupo a mabaybayadan a mangiyuswat ti panaglikidar kadagiti mediamen babaen kadagiti opisiales a narabaw ti panagpanpanunotna ken saanna kayat a maibutaktak dagiti kinukunniber nga aramidna. Idinto idiay Iraq, dagiti journalists ti aksidente a matamaan kadagiti stray bullet. Naidumduma nga agpayso ti Pilipinas.

Ita, nagun-od pay ti pagilian tayo ti “most dangerous place” para kadagiti hues ken abogado basar iti survey ti grupo dagiti legal professionals a nakabase idiay Netherlands. Itay laeng napan a tawen, adda ti 11 nga abogado ken maysa a hues ti napapatay iti pagilian tayo. Iti Ilocos Norte, adda ti 3 nga abogado ken maysa a hues a napapatay sipud 2000.

Amanganta saan tayo a mapupuutan, maagaw pay ti Pilipinas ti titulo ti Indonesia a “most corrupt country” iti intero nga Asia kalpasan a sumarsaruno ti pagilian tayo.

Para iti ibatik a pagpanpanunutan, mabasa iti Juan 1:9, “ No ipudno tayo dagiti basbasol tayo, isu ti mapagtalkan ken nalinteg a mamakawan kadagiti basbasol tayo, ken mangugas kadatayo iti amin a kinakillo.”