August 27, 2006
THE ILOCOS TIMES - ILUKO


ni: Former Senator Heherson T. Alvarez

Roque Ablan: Maysa a patriota, pudno a Filipino

MAYSA a patriota, nawada ti panagpampanunotna, managsirmata ken danggayanna iti aramid ti sawenna. Pudno a Filipino, Dinaliasatna ti dana a manmano a suroten ti kaaduan ket dayta ti namagbalin kenkuana a naidumduma.

Kasta ti pakayababaan ti pakasaritaan daydi Dios-ti-aluadna a Gobernador Roque Ablan ti Ilocos Norte. Gapu kadagita a naiparabur kenkuana a talugading, agtultuloy ti rimat ti lagip kenkuana saan laeng nga tit probinsiana no di pay ket ti intero a pagilian.

Maysa nga eskolar, tinurpos ni Ablan ti Abogasia iti University of the Philippines ket isu ti maika-9 iti 1930 Bar Exams. Natennab a lider-estudiante ken naparaburan iti saririt a kas mannurat, ineditna ti Philippine Collegian ken Philippinesian. Saan a naggudeng ni Roque Ablan a nangsarangat kadagiti dadakkel a tubing ket nagballigi.

Insakadna ti panagadalna, nagtrabaho a kas reporter iti Philippine Herald, ineditna ti Carnival Courier, nangisuro iti Chinese Elementary School ken dadduma pay a pagadalan iti Manila. Nanumo a panagbiag ti nangrugiana, ngem pinabaknang ti pakasaritaan ti panagbiagna ti historia dagiti kailiantayo.

Saan ngarud a nakakaskasdaaw no napili ni Roque Ablan a gobernador iti naganus a tawenna a 32. maysa a gapuanan a maymaysa pay laeng ti nakaartap, ni Benigno “Ninoy” Aquino, ti Nailian a Bannuar, a maysa a henerasion kalpasanna. Napili ni Aquino a Gobernador ti Tarlac iti tawenna a 28. Isuna laeng ta saan a naipasngay ni Roque a nasaliwanwan ti panagbiagna.

Managsirmata, impamuspusanna dagiti kangrunaan a parikut a kas kadagiti laklak-amentayo iti agdama: edukasyon, pannakasaluad ti salun-at, inpraestruktura ken dakdakkel pay nga autonomia dagit. gobierno lokal.

No naisangsangayan a gobernador ni Roque Ablan iti panawen ti kappia, maysa met a malalaki a lider ti panawen ti gubat.

Nangbuay iti bunggoyna a gerilia idi Disiembre 1941 a manglaban kadagiti rimmuat a Hapones idi sumangladda iti Ilocos Norte. Saan a kas iti dadduma a lider, pinilina ti makiranget imbes a makikappon kadagiti probinsia ti Ilokos, Abra ken Cordillera.

Idi matnag ti Bataan idi Abril 9, 1942, dinarup ti bunggoyna dagiti patrulia a Hapones idiay Pampaniki, Solsona idi Nobiembre 8, 1942 ket nagballigida a nangparmek kadagiti kabusor. Gapu itoy, nangibaon dagiti turayen a Hapones iti 100 a ribu a soldadoda a manganup ken ni Ablan.

Idi Disiembre 10, 1942, nagpakada nga agpa-Cagayan tapno makiinnuman ken ni Gobernador Marcelo Adduru a nangipasdek iti gobierno kontra kadagiti kabusor. Kastoy ti imbagana iti pamiliana idi agpakada: “Ayaunayen ta maymaysa ti biagko nga idatonko iti pagiliak. Ngem didak sangitan, agsubliakto kadakayo no agturay manen ti wayawaya itit pagiliantayo.”

Ngem saan a natungpal ti impakada ni Roque Ablan iti pamiliana. Saanen a nakasubli kadakuada kasta met kadagiti isaksakitna a kadaraanna.

Wen, saanen a nagsubli ni Roque manipud iti Cagayan, ngem agnanayon a nalangto ti lagip nga imbatina tapno agpaay nga inspirasion ti patpatgenna a pagilian.

(Ti autor: Maysa met nga Ilokano, nalatak ni Sen. Heherson T. Alvarez a mangilablaban iti wayawaya ken constitutionalist. Kas kada Carlos P. Romulo ken Quintin Paredes, maysa a Tawid Awardee. Isu ti maysa a kaubingan a delegado iti 1971 Constitutional Convention a nakapilianna a maysa kadagiti 10 Most Outstanding Delegates. Tinawen a napili nga Outstanding Senator iti 12 a tawen a panagkamengna iti Senado.)

| Back To Top |

Copyright 2006 Ilocos Times. All rights reserved.
ILUKO

... RISSIK - Dagiti serye ti pammapatay

... BANDU ILUKO - 106th anniversary ti Philippine Civil Service maselebraran

... Roque Ablan: Maysa a patriota, pudno a Filipino