September 2, 2007
THE ILOCOS TIMES - ILUKO


RISSIK
Victor U. Andal

Agsubsubli ti dati nga imahen ti Pinili?’…

DATI a pagbutbutngan ti ili ti Pinili gapu kadagiti nagkaadu nga unsolved crimes. Maibilang pay a high-profile cases dagiti krimen gaputa mabigbigbig a tao wenno mararaem iti komunidad dagiti biktima. Naam-ammo ngarud daytoy a lugar a maysa kadagiti ili a pagnanaedan dagiti maatap a “killer” ken pagrarairaan dagiti loose firearms iti Ilocos Norte. Saan a mailibak daytoy dagiti nagserserbi nga opisial iti ili ti Pinili.

Ngem iti panagtugaw ni dati a Mayor Samuel Pagdilao, inpakatna ti ngipen ti linteg kas maysa a retirado a soldad. Mabalin a kunaen a napagtalnana dagiti notorious killer. Awanen dagiti panawen nga agbubuteng ti tao ditoy.

Iti nadawel a pannakapapatay ni Father Florante Rigonan, Parish Priest iti ili ti Pinili, nagkintayeg dagiti umili. Pagam-amkanda nga agsubli manen ti panawen a maysa daytoy nga ili a pagbutbutngan gapu kadagiti nagkaadu a saan a masolsolbar a kaso ti pammapatay.

Iti panagsarsaritami kenni Mayor Anunciacion Pagdilao, asawa ni dati a Mayor Samuel, maamak iti mabalin a negatibo nga epekto daytoy kadagiti balikbayan ken turista. Natalnan iti ilida kunana, ngem gapu daytoy a pasamak, madanagan a mapukaw a maminpinsan ti napintas a programa iti ili seknan ti peace and order. Apelana kadagiti umili, tumulongda iti pannakasolbar ti pannakapapatay ni Father Rigonan babaen ti panangitedda kadagiti ammoda nga impormasion iti kinatao dagiti suspek. Ad-adalenna payen ti pannakaiyalokar ti pondo para iti maited a gunguna kadagiti informer. -o0o-

BINUKEL ti polisia ti Task Force Rigonan para iti al-alisto a pannakasolbar daytoy a kaso. Ti Task Force ti idauluan ni P/Supt. Pedro Austria, Jr, Deputy Regional Director iti Criminal Investigation and Detection Group (CIDG).

Bayat a maisursurat daytoy a damag, addan uppat a tao a naidalan ti paraffin test iti PNP Crime Laboratory tapno madeterminar nu siasinno kadakuada ti nagpaputok ti paltog pakairamanan ti maysa a pulis ken maysa a tomboy.

Ni Father Rigonan ti agawiden manipud iti maysa a prayer service iti pamilia Macalma idi mapaltopaltogan iti Barangay Puritac, agarup alas dies ti rabii iti Agosto 28. Aglugan koman iti van idi mapasamak ti insidente, 9 kapsula ti M-16 riffle ti narekober iti crime scene. Rumrumuar a dua dagiti suspek, maysa a triggerman ken maysa a look-out.

Apal ti kangrunaan nga ad-adalen nga anggulo dagiti otoridad. Ngamin dagitin agasawa a Florencio ken Alicia Macalma ti nangted ti 5 million pesos kenni Father Rigonan para iti pannakaipasdek ti baro a simbaan. Inikkanda pay iti bukodna a lugan, maysa a Toyota Hi-Ace Van. -o0o-

INSIGIDA met a kinondenar ni Bishop Sergio Utleg iti Diocese of Laoag ti pannakapapatay ti maysa a parish priest. Kiniddawna iti pannakaipaay ti hustisia iti pannakapapatay ni Father Rigonan.

Inbatad met ni Walter, kabsat ni Father Rigonan, saanda a kiiddawen ti alisto a pannakasolbar ti kaso, ngem ti kalikagumna isu ti pannakaarestar ti pudpudno a suspek.

Palawagna a kina-doktor ti talaga nga ambisyon ti kabsatna sipud kina-ubingna. Nalpas ni Father Rigonan ti third year iti school of medicine, ngem saanna a ninamnama a sumrek daytoy iti seminario. Agtawen ti 37 idi mangrugi nga agserbi a padi. Ti dakkel a pagsiddaawan ni Walter, ad-adda a pinili ti kabsatna ti nagpa-destino kadagiti babassit nga ili kas koma iti Currimao ken iti Pinili ngem iti lugarda iti Batac, a maysa itan a siudad. Palawag kenkuana ti kabsatna, kaykayatna kan ti mangrugi iti basbassit a simbaan tapno isuna ti mangpadakkel. Malagipna pay ti estoria ti kabsatna, 8 laeng ti nagatendar ti immuna a misana iti Pinili aginggana a napadakkelna ken naipasdekna ti dakdakkel a simbaan babaen laeng iti tulong dagiti naayat a deboto. -o0o-

GAPU iti daytoy a pasamak, nagbalin manen a linaon ti Ilocos Norte kadagiti radio, telebisyon ken pagiwarnak, saan laeng iti intero a Pilipinas ngem iti kabangibang a pagilian.

Saan ngarud nga ibilang daytoy ti PNP nga isolated case manen kas kadagiti immuna a kaso manipud iti grupo dagiti abogado, negosiante ken uray kadagiti pulitiko. Mayo iti daytoy a tawen idi mapapatay met ti maysa a mayor iti Ilocos Norte.

Napateg ti biag, ordinario man wenno mabigbigbig a tao. Saan a maiparbeng a pillien dagiti kaskaso nga ikkan ti importansia. Nasken nga agtignay ti PNP a mangtagiben ti linak ken talna. Kumpiskaren dagiti loose firearms, paigetan pay ti police visibility ken papigsaen ti intelligence network. Iyasideg ti polisia ti riknada kadagiti umili tapno maalada ti kumpiyansada a tumulong nga agited kadagiti impormasion iti pannakapugipog dagiti managdakdakes ken agik-ikot kadagiti armas. -o0o-

PARA iti aniaman a reaksion iti daytoy nga artikulo, ag-email iti ilocos.rissik@yahoo.com.

Para iti ad-adu pay a damdamag iti bukod tayo a lugar, buyaen ti

TV Patrol Laoag iti ABS-CBN Channel 2, 6:00-6:30 pm, Lunes aginggana iti Biernes.

| Back To Top |

Copyright 2007 Ilocos Times. All rights reserved.
ILUKO

... RISSIK - ‘Ilocos Norte, agbalbalinen a lugar dagiti mammapatay, pagrarairaan dagiti paltog ken unsolved crimes…’

... RISSIK (2) - Agsubsubli ti dati nga imahen ti Pinili?

... BANDU ILUKO - Remembering Da Apo

... BANDU ILUKO (2) - Promising young leaders express concern on tourism promotion

... BANDU ILUKO (3) - Saud beach, best tourist destination in Asia